எங்கள் குரல் ஓரினம் வலைப்பதிவு

தில்லி மாற்றுப் பாலின-பாலீர்ப்பு சுயமரியாதை விழாவில் தலித் குரல்கள்

மொழிபெயர்ப்பு : கிரீஷ்

நவம்பர் 29, 2015 அன்று டெல்லியில் மாறுமட்டோருக்கான எட்டாவது ஆண்டு பேரணி நடைபெற்றது. மாறுபட்ட பாலின-பாலீர்ப்பு கொண்ட மக்கள், அவர்களது குடும்பத்தினர், ஆதரவாளர்கள் மற்றும் நண்பர்கள் எனப் பலவாரியான மக்கள் இந்த பேரணியில் கலந்து கொண்டனர். வழக்கமான பேரணிகளை போல் இல்லாமல் இந்தமுறை  சாதீயத்திற்கு எதிராக ஒரு அழுத்தமான அறிக்கை வெளியிடப்பட்டது.

பேரணியின் முடிவில் அகில் கங், துருபோ ஜோதி மற்றும் திரேன் போரிஸா என்கிற மூன்று தலித் மாற்றுப் பாலினத்தவர்கள் அந்த அறிக்கையை வெளியிட்டனர்.

அறிக்கை:

ஒழுங்கீனமானவர்கள், தவறானவர்கள், இயற்கைக்கு மாறானவர்கள் என முத்திரை குத்தப்பட்டுள்ள  நாம் எல்லோரும் இந்த சமயத்தில்  ஒன்றாக இணைந்துள்ளோம்.

மாறுபட்டவர்களாக இருப்பதிலும், நம்மை வேறு யாருக்காகவும் மாற்றிக்கொள்ளாதவர்களாக இருப்பதிலும் நாம் பெருமை கொள்கிறோம். நமது வேறுபாட்டை, நமக்குள் இருக்கும் வேறுபாட்டை, நமக்கு இடையே இருக்கும் வேறுபாட்டை நாம் கொண்டாடுகிறோம்.

ஆனால் ஒரு தலித்தாக எங்களது சாதி அடையாளங்களை ஒப்புக்கொள்ளாமலும், கொண்டாடாமலும் நாங்கள் பெருமையடைய முடியாது.

எங்களைப் பொறுத்தவரையில் வெளிவருதல் என்பது எங்களது பாலீர்ப்பை மட்டுமல்ல, எங்களது சாதியை வெளிப்படுத்துவதும்  சேர்த்து தான்.

யார் யாருடன் வாழ வேண்டும் என்கிற சமுதாயக் கட்டமைப்புகளை சமுதாயப் படிநிலைகளுடன் இணைத்தே உடைக்க விரும்புகிறோம்.

நாங்கள் எங்களுடைய வேறுபாட்டைக் கொண்டாடுகிற அதே நேரம் எங்களது சக ஒடுக்கப்பட்ட தோழர்கள் தினம் தினம் அவர்களது வாழ்க்கையில் சந்திக்கும் இன்னல்களையும் பெருமையுடன் நினைவு கொள்கிறோம்.

அனைவருக்கும் சாதி இன்னமும் உயிரோடு இருப்பதையும்,  அது சமூகத்தில் புரையோடிப் போய் இருப்பதையும் நினைவு படுத்த விரும்புகிறோம். எங்களது வாழ்க்கையில், நமது நகரங்களில், நமது

நாட்டில் நிரம்பியுள்ள சாதி எங்களது உயிரை மட்டுமல்ல, எங்களது கலாச்சாரம், வரலாறு மற்றும் அடையாளத்தையும் சேர்த்தே அழிக்கிறது. கிராமப்புற இந்தியாவில் உள்ள எங்களது தலித் குழந்தைகளை அவமானப்படுத்துவதோடு அவர்களது குரல்வளையையும் நெறிக்கிறது.

ஒருவரை ஒடுக்க நினைக்கும் பொதுச்சமூகம் தாழ்த்தப் பட்டவர்களையும், மாற்றுப் பாலின-பாலீர்ப்பு கொண்ட மக்களையும் ஒரே போலவே நடத்துகிறது. எனவே மாறுபட்டோரையும், தாழ்த்தப்பட்டோரையும் வேறுபடுத்திப் பார்க்க முடியாது என்பதையும் நினைவு படுத்த விரும்புகிறோம்.

எனவே எதிர் பாலீர்ப்பு வழமையின் வரையறுக்கப்பட்ட வாழ்க்கை முறைக்கு எதிராக மட்டுமல்ல, சாதிக்கட்டமைப்புகளுக்கு எதிராகவும்  நாம் இணைந்திருப்போம். வாழ்த்துகள்!

This post is also available in: English

Leave a Reply

Your email address will not be published. Required fields are marked *